كوردیش ڤاینس.. بە كورتە ڤیدیۆ باسی عەیبەكانی كورد دەكەن

kurdishvines2
رووداو – فینلەندا
چەند گەنجێكی كورد بۆ بەخشینی شادی بە هاووڵاتیانی كورد، پەیجێكیان لەسەر تۆڕی كۆمەڵایەتی فەیسبووك دروستكردووە بەناوی “كوردیش ڤاینس”، كە رۆژانە ڤیدیۆی كۆمیدی خەڵكی تێدا بڵاو دەكەنەوەو بە هەزاران كەس تەماشایان دەكەن و بەو شێوەیە خەندە دەخەنە سەر لێوی خەڵك.

ئەو ڤیدیۆیانەی لەو پەیجەدا بڵاودەكرێنەوە بەشێوەیەكی زۆر كۆمیدی باس لە جیاوازییەكانی كورد و رۆژئاواییەكان دەكات.

ئیدریس ئەمیر، تەمەن 20 ساڵ و دانیشتووی فینلەندا، لە پاڵ خوێندنی بیناسازی ئەدمینی پەیجی كوردیش ڤاینسە. ئیدریس دەڵێت “لەگەڵ دوو هاوكارم ئەم پەیجە بەڕێوەدەبەم، هەرچەندە زۆر كەس هەوڵی شكاندنمان دەدەن، بەڵام بەردەوام دەبین”.

هەرچەندە ئەو سەرقاڵی خوێندنە، بەڵام زۆربەی كاتەكانی بۆ بەڕێوەبردنی ئەو پەیجە تەرخانكردووە “رۆژانە چەندین كاژێر بەدیار ئەو پەیجەوە دادەنیشم و ئاگاداری نامەكان دەبم، هەر كاتم هەبوو سەرقاڵی لاپەڕەكە دەبم”.

ڤاینس واتە ڤیدیۆی كورت. ئیدریس دەڵێت “پەیجەكەی ئێمەش ڤاینی كۆمیدی كوردییە و تاكە مەبەستمان بەخشینی خەندە و پێكەنینە بە هەموو ئەو چاو و دڵانەی سەردانمان دەكەن”.

سەبارەت بە بیرۆكەی دروستكردنی ئەو پەیجە، ئیدریس دەڵێت “ڤاین لە زۆربەی وڵاتان هەیە كە ڤیدیۆی كورت و گاڵتەئامێز بڵاودەكەنەوە، ئێمەش ئەو بیرۆكەیەمان بۆ هات كە بۆ یەكەمجار ڤاینێكی كوردی دروستبكەین و بتوانین لەڕێی ئەم پەیجەوە خەندە بخەینە سەر لێوی هاووڵاتیان”.

جگە لەو ڤیدیۆیانەی خۆیان دەیدۆزنەوە و ئەپلۆدی دەكەن لە پەیجەكانیان، هاوڕێیانی ئەو پەیجەش رۆژانە چەندین ڤیدیۆیان بۆ دەنێرن، سەبارەت بە مەرجی وەرگرتنی ئەو ڤیدیۆیانە ئیدریس دەڵێت “ئێمە سەیری هەموو ئەو ڤیدیۆیانە دەكەین كە بۆمان دێت و دواتر هەڵیاندەبژێرین. مەرجیشمان ئەوەیە كە ڤیدیۆكان كورت بن، چونكە ڤاین گرتە ڤیدیۆی كورتە، هەروەها نابێت لە نێو گرتەكەدا سووكایەتی بە هیچ كەس و لایەن یان ئاینێكی تێدا بێت”.

رۆژانە چەندین كەس سەردانی ئەو پەیجە دەكەن كە ئیدریس ژمارەیان بە دروستی نازانێت، بەڵام دەڵێت “ئەو كەسانەی سەردانمان دەكەن زۆركات گەنجن، بەهۆی ئەوەی زیاتر گەنجان كار بە ئینتەرنێت دەكەن، بەڵام بینەری زۆری دیكەمان هەیە لە تەمەنی جیاوازدا لە ناوەوە و دەرەوەی كوردستان”.

ئایا ئەدمینەكانی ئەو پەیجە خۆیان تا چەند بەو ڤیدیۆیانە سەرسامن و تاچەند پێیان پێدەكەنن؟ ئیدریس دەڵێت “جاری وا هەیە خۆمان چەندین جار تەماشای ڤیدیۆكە دەكەین پێش بڵاوكردنەوەی، بە راستی هەندێ ڤیدیۆ چەند جار بیبینی هەر پێدەكەنی، چونكە شتەكان واقیعی و پێكەنیناوین”.

ئیدریس لەبارەی ناسنامەی ئەو ئەكتەرانەی بەشداری لە تۆماركردنی ئەو كورتە ڤیدیۆ كۆمیدیانە دەكەن گوتی “ئەكتەرەكان كەسانی ئاسایی نیشتەجێی وڵاتی جیاوازن، ئێمە زۆر زانیاریمان لەسەریان نییە، هەندێكیان زیاتر ناسراون، چونكە كاری زۆر دەكەن و ڤیدیۆیان زۆرە. زۆر كەس وا دەزانن ئەدمیەنەكان خۆیان ئەكتەرن، بەڵام وانییە و ئێمە تەنیا ڤیدیۆی خەڵك وەردەگرین و بڵاوی دەكەینەوە”.

هەرچەندە ئیدریس و هاوڕێكانی رۆژانە خەندە دەخەنە سەر لێوی چەندین سەردانیكەری پەیجەكەیان، بەڵام گوتی زۆرجار لەسەر ئەو كارە رەخنەیان لێدەگیرێت “كێشە و رەخنەی زۆرمان بەرەوڕوو بووەتەوە. زۆر لە گۆڤار و رۆژنامە و ماڵپەڕەكان هێرشی توندیان كردووەتە سەرمان و ئێمەیان بە دژە كورد ناوبردووە بێ ئەوەی لە مەبەستی ئێمە تێگەیشتبن. هەروەها لە رێگەی نامەی پەیجەوە زۆر كات جنێوی ناشیرین و هەڕەشەمان بۆ هاتووە”.

لەبارەی ئەوەی كە خەڵكی كوردستان زیاتر رەخنەیان لێدەگرن یان كوردی تاراوگەنشین، ئیدریس دەڵێت “بە گشتی رەخنەكان زیاتر خەڵكی ناو كوردستان لێمان دەگرن، كوردانی دەرەوەی وڵات زۆریان لەو ڤیدیۆیانە بینیوە و خۆیانی تێدا دەبیننەوە یاخود راهاتوون پێی، بەڵام بۆ خەڵكی ناو كوردستان شتێكی تازەیە و كاتی دەوێت تا رادێن”.

Share Button

بۆچوون نووسین

بۆچوون