بەهمەن قوبادی نامەیەک بۆ نوری مالکی دەنیرێت

bahman2
بەهمەن قوبادی لە نامەیەكدا بۆ نووری مالكی: تكایە واز لە كوردەكان بێنە جەنابی سەرۆك وەزیر!

سینەماكاری كورد بەهمەن قوبادی لە نامەیەكدا بۆ نووری مالكی سەرۆك وەزیرانی عێراق نووسیوییەتی: تكایە واز لە كوردەكان بێنە جەنابی سەرۆك وەزیر!
سینەماكاری كورد بەهمەن قوبادی نامەیەكی بۆ نووری مالكی سەرۆك وەزیرانی عێراق نووسیوە كە ئەمەی خوارەوە دەقەكەیەتی:
جەنابی مالكی، سەرۆك وەزیرانی بەڕێزی عێراق
سڵاو
بە زمانی فارسی نامەكەتان بۆ دەنووسم، چونكە دەزانم لە تەواوی ئەو ساڵانەی كە لەگەڵ هەڤاڵان و هاوبیرەكانتان لە ئێران ژیانتان بەسەردەبرد، بە باشی فێری ئەم زمانە بوون، بەكارتان هێناوە و ئێستاش هەر بەكاری دێنن.
من هەمووكات لە دنیای سیاسەت بێزاربووم و بەردەوام لە سیاسەتمەدارەكان دوورە پەرێز بووم، بەڵام هۆی ئەوەی كە ئێستاكە وازم لەم خووە بەدەر لە عادەتەم هێناوە و ئەم نامەیەم بۆ ئێوە نووسی، ئەوە بوو كە ئەمڕۆكە، بە شوێن كەوتنی هەواڵەكانی عێراق و ناوچەكە، بینیم كە بە زمانی هەڕەشە قسەدەكەن.
كاتێك كە لە كوردستانی ئێران بووم دەمبینی كە لە گرمەی جەنگدا، پارەیەك كە لە لایەن دەوڵەتی ناوەندی دەبوو بۆ ژیان، ئەمنییەت، ئاسایش و كەلتووری ئێمەی كوردەكان سەرف بكرێت، بە بیانووی جۆراوجۆری سیاسی بۆ دابینكردنی خەرجە گەورەكانی ئێوە و كەسانێكی وەكوو ئێوە سەرف دەكرا. ئێستا دوای تێپەڕبوونی ئەم هەمووە ساڵە، وا دیارە خولیای نەوت و پارەی نەوت، وێڵی نەكردوون و بە شوێن تۆماركردن و دەست بەسەرداگرتن و چاودێری بەسەر داهاتی نەوتی هاووڵاتیانی كوردی خۆتان لە بەرژەوەندی دەوڵەتیی ناوەندی عێراقن. ئەو هاووڵاتیانەی كە ـ بەڕاستی بڵێم ـ لە نیشتمان پەروەی ئێوەدا ڕەشبینن.
لە تەواوی ئەو ساڵانەی كە كوردەكانی عێراق كۆمەڵكوژ دەكران، كیمیایی دەكران و یا ئەوەی كە چنگی خوێناوی ئەنفال، ڕوخساری خاوێن و ناسكی كوردستانی دەڕوشاند، ئێوە لە كوێی بوون؟ مەگە ئەوكات كوردەكان هاووڵاتی ئێوە نەبوون؟ ئێوە و هەڤاڵانتان لەم وڵاتە أۆیشتن و لە چاوەڕوانی ڕۆژانی خۆشی سەرۆك وەزیری، سووچێكی ئەمن و بێدەنگتان بۆ خۆتان هەڵبژارد. بەڵام كوردەكان لە وڵاتەكەیاندا مانەوە و لەگەڵ جەنگ و تاڵانكردن وتوندووتیژی و هەژاری ڕۆژگاریان بەسەر برد و ئەویندارانە خزمەتی نیشتمانەكەیان كرد.ئێستا، دروست كاتێك هەلوومەرجەكە ڕەخساوە تا پاش ئەو هەمووە بەڵا و نەگبەتییە، بتوانن بە فرۆشی نەوت، نیشتمانی دایكییان، ماڵە ڕووخاوەكەیان سەرلەنوێی بونیاد بنێنەوە، ئەو زەویانەی كە پڕ لە ئەڵغامن بۆ كشتووكاڵ ئامادەی بكەن و بۆ لەشە كەمئەندامەكانی خەڵكی ئەم نیشتمانە دەست و پێی دەستكرد دروست بكەن، دەتانەوێت رێگە لەوانە بگرن و لە پێكهێنانی بەهەشتێك لە باكووریوڵاتەكەتاندا بەرگری بكەن؟بە لەبەر چاوگرتنی ئەو هەمووە نەوتەی كە لە ناوەند و باشووری عێراق دەیفرۆشن، چ پێویستییەكتان بەم چەند بیرە نەوتییەی كوردستان هەیە؟ لەڕاستیدا بە پارەی ئەم هەمووە نەوتەی كە لە ماوەی 10 ساڵی ڕابردوودا فرۆشتووتانە، چ كارێكی ئەوتۆتان بۆ عێراقییە شیعە و سوننەكان كردووە كە كوردەكانیش دڵیان پێی خۆش بێت و متمانەیان بە لێهاتوویی و هاودڵیی ئێوە هەبێت و دەسەڵاتی فرۆشی نەوت بە ئێوە بسپێرن؟ نە شتێكتان بە ژێرخانی وڵاتەكە زیاد كرد و نە بە ئاسایش و سەقامگیرییەكەی. كاتێك كوردەكان ئێوە سەربەست لە هێزە بیانییەكان دانانێنن و لەو بڕوایەدان دەوڵەتی ئاڵۆز و بێ دەسەڵاتی ئێوە زیاتر لەوەی كە لە بیری خەڵكەكەیدا بێت لە بیری هاوڕێیی و هاودڵیی لەگەڵ هێزەكانی بیانی دایە، ئاشكرایە كە ڕووی خۆشی خۆیان نیشانی ئێوە نادەن. بۆچی دەبێت داهاتی دەستكەوتوو لە فرۆشی نەوتی هەرێمی كوردستان لە أێی سندووقی دەوڵەتی ناوەندییەوە تێپەڕێت؟ كاتێك مەترسی ئەوە هەیە كە بەشێك لەم پارەیە بڕژێتە گیرفانی دەڵاڵەكانی چەكەوە و بواری سەركوتكردن و كوشتن لە بەشێك لەم وڵات یا ئەو وڵاتەی دیكە بڕەخسێت؟ بەڕێز سەرۆك وەزیر!لە جیاتی پەرەپێدان بە ڕق و دوژمنایەتیی و دووبەرەكی نەتەوەیی و ئایینییەكان، وا باشتر نییە دەست بە كارێكی باش و ڕێكووپێك بكەن و بە دامەزراندنی دەوڵەتێكی فیدڕاڵ، پێكهاتوو لە شیعەكان، سوننەكان و كوردەكان لە ژێر یەك ئاڵادا، هەم ئاشتی و خۆشی و بەرەپێشكەوتن بۆ وڵاتەكەتان بە دیاری دێینن و هەمیش ناو و ناوبانگێكی باش لە خۆتان لە مێژوو تۆماردەكەن؟ ترسم لەوەیە كە بە درێژەپێدان ئەم ڕەوتە، ڕوخسارێكی ناحەز و ڕەش و لێل و ناوێكی خراپ لە خۆتان لە كتێبی مێژووی وڵاتدا هەڵدەكەنن.
بەڕێز سەرۆك وەزیر! ئایا تا ئەم كاتە بەدەر لە پیشەی سیاسیەت و دنیای سیاسیەت، چاوتان لە خەریتەی عێراق كردووە تا ببینن كوردستان لە كوێی ئەم نەخشەیە دایە؟ دڵی عێراق نیشانەی خۆتان مەكەن بەڕێز سەرۆك وەزیر، كە ئاكامێكی باشی نییە، مەهێڵن بەهاری كوردی سەرهەڵبدات. چ گرفتێك دێتە پێشێی بێتوو بهێڵن عێراق لە ناو دڵیدا بەهەشتێكی تێدابێت؟
تكایە واز لە كوردەكان بێنە جەنابی سەرۆك وەزیر!

Share Button

بۆچوون نووسین

بۆچوون